ආරම්භයේදීම අග්‍රාමාත්‍යවරිය මෙහිදී පැවසුවේ, ශ්‍රී ලංකාවේ ආර්ථික ස්ථාවරත්වය ශක්තිමත් කිරීම සඳහා වෘත්තීය අධ්‍යාපනය දියුණු කිරීම රජයේ අරමුණ බවයි.
අග්‍රාමාත්‍ය ආචාර්ය හරිණී අමරසූරිය මහත්මිය මෙම අදහස් පළ කළේ, එළඹෙන “ශ්‍රී ලංකා නිපුණතා ප්‍රදර්ශනය 2025” (Sri Lanka Skills Expo 2025) සම්බන්ධයෙන් අගෝස්තු 13 වන දින කොළඹ සිනමන් ග්‍රෑන්ඩ් හෝටලයේ පැවති මාධ්‍ය හමුවකදී බව අග්‍රාමාත්‍ය මාධ්‍ය අංශය පවසයි.
ශ්‍රී ලංකාවේ තරුණ විරැකියාව අවම කිරීමේ අරමුණින් මෙම ප්‍රදර්ශනය තුන්වන වරටත් ඔක්තෝබර් 10 සහ 11 යන දිනවල අරලියගහ මන්දිරයේ ප්‍රධාන ශාලාවේදී පැවැත්වීමට නියමිතය.
මෙම වැඩසටහන කර්මාන්ත අංශ නිපුණතා සභා (ISSC) සහ අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශය එක්ව සංවිධානය කරයි.
අග්‍රාමාත්‍යවරිය මෙහිදී වැඩිදුරටත් කියා සිටියේ, වත්මන් අධ්‍යාපන ක්‍රමය යටතේ සිසුන් ගණිතය, විද්‍යාව සහ වාණිජ යන විෂය ධාරාවන්ට යොමු කරන බවයි. ඉන්, අසමත් වන සිසුන් වෘත්තීය අධ්‍යාපනයට යොමු කෙරෙන බව ඇය පැවසුවාය. වෘත්තීය අධ්‍යාපනය අසමත් වූ පසු යොමු වන ක්ෂේත්‍රයක් නොවිය යුතු අතර එය තෝරාගැනීමක් විය යුතු බව අගමැතිනිය අවධාරණය කළාය.
තාක්ෂණය ශීඝ්‍රයෙන් වෙනස් වන බව අවධාරණය කළ ආචාර්ය අමරසූරිය මහත්මිය, විවිධ වෘත්තීය දැනුම සහිත මානව සම්පත් පදනමක් ඇති කිරීමේ අවශ්‍යතාවය ද අවධාරණය කළාය.
තවද, මෙම වෙනස්වීම්වලට නම්‍යශීලීව සහ දැනුමෙන් අඛණ්ඩව අනුවර්තනය වීමේ හැකියාවෙන් රටේ දරුවන් සන්නද්ධ කිරීමේ වැදගත්කම ද අග්‍රාමාත්‍ය හරිණී මහත්මිය අවධාරණය කළාය.
අග්‍රාමාත්‍යවරියගේ ප්‍රකාශය
“වර්තමාන අධ්‍යාපන ක්‍රමය යටතේ සිසුන් ගණිතය, විද්‍යාව සහ වාණිජ යන විෂය ධාරාවන්ට යොමු කෙරෙනවා. මෙම විෂයන් සඳහා සුදුසුකම් නොලබන අය එම අදාළ ක්ෂේත්‍රය තෝරා ගැනීමට පෙලඹෙනවා. ඔවුන් අතර, අසමත් වන සිසුන් වෘත්තීය අධ්‍යාපනයට යොමු කෙරෙනවා. වෘත්තීය අධ්‍යාපනය අසමත් වූ පසු යොමු වන ක්ෂේත්‍රයක් නොවිය යුතු අතර එය තෝරාගැනීමක් විය යුතුයි.
අපගේ අධ්‍යාපන ප්‍රතිසංස්කරණවල කොටසක් ලෙස, සිසුන් 10 ශ්‍රේණියට ළඟා වන විට, ඔවුන්ට අවශ්‍ය වෘත්තිය පිළිබඳ පැහැදිලි අවබෝධයක් ලබා දී ඒ අනුව ඔවුන් යොමු කිරීම අපගේ අරමුණයි.
තාක්ෂණය ශීඝ්‍රයෙන් වෙනස් වෙනවා. එම නිසා, අපට විවිධ වෘත්තීය දැනුම සහිත මානව සම්පත් පදනමක් අවශ්‍යයි. අපගේ දරුවන් නම්‍යශීලීව සහ දැනුමෙන් මෙම වෙනස්කම්වලට අඛණ්ඩව අනුවර්තනය වීමේ හැකියාවෙන් සන්නද්ධ කළ යුතුයි. දැනුම ලබා දීමත් සමඟම, මානව වටිනාකම්වලින් පොහොසත් පුද්ගලයන් ලෙස ඔවුන් පෝෂණය කිරීම ද ඒ හා සමානවම වැදගත්.
නව ලෝකයට පිවිසීමට වෘත්තීය අධ්‍යාපනය අත්‍යවශ්‍ය බැවින්, අපගේ අධ්‍යාපන ප්‍රතිසංස්කරණවලදී එයට විශේෂ අවධානයක් යොමු කර තිබෙනවා.
මෙම ප්‍රදර්ශනය තුළින් දරුවන්ට විවිධ වෘත්තීන් පිළිබඳ පුළුල් අවබෝධයක් ලැබෙනු ඇතැයි මම විශ්වාස කරනවා.”
මෙම අවස්ථාවට අධ්‍යාපන අමාත්‍යාංශයේ ලේකම් නාලක කලු‍වාරච්චි මහතා, අධ්‍යාපන අමාත්‍යාංශයේ නිලධාරීන් සහ කර්මාන්ත අංශ නිපුණතා සභාවල (ISSC) නියෝජිතයින් සහභාගී විය.
