එළඹෙන සැප්තැම්බර් මාසයේ පැවැත්වීමට නියමිත එක්සත් ජාතීන්ගේ මානව හිමිකම් කවුන්සිල (UNHRC) සැසිවාරයේදී ශ්‍රී ලංකාවේ මානව හිමිකම් තත්ත්වය පිළිබඳව වාර්තාවක් ඉදිරිපත් කිරීමට එක්සත් ජාතීන්ගේ මානව හිමිකම් ප්‍රධානී වෝල්කර් ටර්ක් මහතා නියමිතයි.
මෙම වාර්තාව, ජුනි මාසයේදී ශ්‍රී ලංකාවේ සිදු කළ නිල සංචාරයේදී ඔහු ලබාගත් කරුණු මත පදනම් වී තිබෙනවා. මෙම සංචාරයේදී ඔහු රජයේ නිලධාරීන්, සිවිල් සමාජ ක්‍රියාකාරීන්, අතීත ගැටුම්වලින් විපතට පත් වූවන් හමුවූ අතර, යුද සමයේදී සිදුවූ බවට චෝදනා කෙරෙන මානව හිමිකම් කඩවීම් සම්බන්ධයෙන් වන චෙම්මනි සමූහ මිනීවළ භූමියද නිරීක්ෂණය කළා.
මෙම වාර්තාව මගින් පශ්චාත්-ගැටුම් සමයේ ප්‍රතිසන්ධානය, සංක්‍රාන්තික යුක්තිය, ඉඩම් අයිතිය සහ සිවිල් නිදහසට අදාළ මානව හිමිකම් ගැටළු පිළිබඳව අවධානය යොමු කිරීමට අපේක්ෂා කරනවා. මෙම වාර්තාව සහ එක්සත් රාජධානිය හා කැනඩාව විසින් ඉදිරිපත් කිරීමට නියමිත නව යෝජනාවක් මගින් ශ්‍රී ලංකාවට ජාත්‍යන්තර මට්ටමින් වැඩි පීඩනයක් එල්ල විය හැකි බවට විචාරකයින් පෙන්වා දෙනවා.
ශ්‍රී ලංකා රජය වෙනුවෙන් විදේශ කටයුතු අමාත්‍ය විජිත් හේරත් මහතා මේ සඳහා ජිනීවා නුවරට සහභාගි වී, වාර්තාවට සහ යෝජනා සඳහා රජයේ නිල ස්ථාවරය ඉදිරිපත් කිරීමට නියමිතයි.
