සූදු නියාමන අධිකාරි පනතට COPF අනුමැතිය
සූදු නියාමන අධිකාරියක් පිහිටුවීම සඳහා වන පනත් කෙටුම්පතට මුදල් කාරක සභාවේ (COPF) අනුමැතිය හිමිව තිබේ.
පාර්ලිමේන්තු මන්ත්‍රී රවුෆ් හකීම් මහතාගේ වැඩබලන සභාපතිත්වයෙන් පැවැති මුදල් කාරක සභා රැස්වීමේදී මෙම පනත් කෙටුම්පත අනුමත වූ බව පාර්ලිමේන්තුවේ සන්නිවේදන දෙපාර්තමේන්තුව සඳහන් කළේය.
මෙම පනත් කෙටුම්පත මුදල් කාරක සභාවේදී අවස්ථා කිහිපයකදී සාකච්ඡා කර ඇති අතර, ශ්‍රී ලංකාවේ ඔට්ටු ඇල්ලීමේ සහ සූදු ආයතන ප්‍රමිතිකරණයට, සමාජ හානිය අවම කිරීමට, සංචාරක ක්ෂේත්‍රය දියුණු කිරීමට සහ ආර්ථිකය වර්ධනය කිරීමට පුළුල් විෂය පථයක් සහිත ස්වාධීන නියාමන ආයතනයක් ලෙස සූදු නියාමන අධිකාරිය ස්ථාපිත කිරීම සඳහා මෙම පනත යෝජනා කරන බව සන්නිවේදන දෙපාර්තමේන්තුව නිකුත් කළ නිවේදනයේ සඳහන් වේ.
තවද, 2025.04.28 දිනැති අතිවිශේෂ ගැසට් පත්‍ර අංක 2434/02 යටතේ ප්‍රකාශයට පත් කරන ලද ආනයන බදු සම්බන්ධයෙන් රේගු ආඥාපනතේ (235 වන පරිච්ඡේදය) 10 වන වගන්තිය යටතේ වූ යෝජනාව, 2025.04.28 දිනැති අතිවිශේෂ ගැසට් පත්‍ර අංක 2434/04 යටතේ ප්‍රකාශයට පත් කරන ලද 1989 අංක 13 දරන සුරාබදු (විශේෂ විධිවිධාන) පනතේ 3 වන වගන්තිය යටතේ වූ නියෝගය සහ 2025.04.28 දිනැති අතිවිශේෂ ගැසට් පත්‍ර අංක 2434/05 යටතේ ප්‍රකාශයට පත් කරන ලද මෝටර් රථ සඳහා වන සුඛෝපභෝගී බදු සම්බන්ධයෙන් 2018 අංක 35 දරන මූල්‍ය පනතේ 19 වන වගන්තිය සමඟ කියවිය යුතු 51 වන වගන්තිය යටතේ වූ රෙගුලාසිය ද කාරක සභාව විසින් සලකා බලා අනුමත කර ඇත.
මෙම රැස්වීමට නියෝජ්‍ය අමාත්‍ය චතුරංග අබේසිංහ, පාර්ලිමේන්තු මන්ත්‍රීවරුන් වන රවි කරුණානායක, (ආචාර්ය) කෞෂල්‍යා ආරියරත්න, නීතිඥ ලක්මාලි හේමචන්ද්‍ර සහ නිශාන්ත ජයවීර යන මහත්ම මහත්මීහු සහභාගී වූහ.
