අපරාධ පරීක්ෂණ දෙපාර්තමේන්තුව (CID) විසින් අත්අඩංගුවට ගත් හිටපු ජනාධිපති රනිල් වික්‍රමසිංහ මහතා මීට සුළු මොහොතකට පෙර කොළඹ කොටුව මහේස්ත්‍රාත් අධිකරණයට ඉදිරිපත් කර තිබේ.1
අද දෙරණ වාර්තාකරු පැවසුවේ, ඔහු දැඩි ආරක්ෂාව යටතේ අපරාධ පරීක්ෂණ දෙපාර්තමේන්තුවේ නිලධාරීන් විසින් අධිකරණ භූමියට රැගෙන ආ බවයි.
දැනට සිදුවෙමින් පවතින විමර්ශනයක් සම්බන්ධයෙන් ප්‍රකාශයක් ලබා දීමට CID වෙත පැමිණීමෙන් පසු හිටපු ජනාධිපති වික්‍රමසිංහ මහතා අද (22) අත්අඩංගුවට ගනු ලැබීය.2
ඒ අනුව, ජනාධිපතිවරයා ලෙස කටයුතු කළ සමයේ ඔහුගේ බිරිඳ වන මහාචාර්ය මෛත්‍රී වික්‍රමසිංහ මහත්මියගේ උපාධි ප්‍රදානෝත්සවයකට සහභාගී වීම සඳහා රාජ්‍ය අරමුදල් යොදා ගනිමින් ලන්ඩනයට ගිය සංචාරයක් පිළිබඳව මෙම විමර්ශනය කෙරෙන බව වැඩිදුරටත් සඳහන් වේ.
මෙම නඩුවට අදාළව අපරාධ පරීක්ෂණ දෙපාර්තමේන්තුව පසුගිය ජුනි මස 24 වන දින කොටුව මහේස්ත්‍රාත් අධිකරණය හමුවට කරුණු ඉදිරිපත් කර තිබුණි.
ඉන් අනතුරුව, හිටපු ජනාධිපතිවරයාගේ පෞද්ගලික ලේකම් ලෙස කටයුතු කළ සැන්ඩ්‍රා පෙරේරා මහත්මියගෙන් සහ හිටපු ජනාධිපති ලේකම් සමන් ඒකනායක මහතාගෙන් ප්‍රකාශ සටහන් කරගෙන තිබුණි.
මේ සම්බන්ධයෙන් ප්‍රකාශයක් ලබා දීම සඳහා අපරාධ පරීක්ෂණ දෙපාර්තමේන්තුව විසින් වික්‍රමසිංහ මහතා කැඳවා තිබූ අතර, අද පෙරවරු 9 ට පමණ ඔහු CID මූලස්ථානයට පැමිණි අතර, ප්‍රකාශ සටහන් කර ගැනීමෙන් පසු අත්අඩංගුවට ගෙන ඇත.3
රාජ්‍ය නායකයා ලෙස සිටියදී, බ්‍රිතාන්‍ය විශ්ව විද්‍යාලයක පැවති ඔහුගේ බිරිඳගේ උත්සවයකට සහභාගී වීම සඳහා 2023 සැප්තැම්බර් මාසයේදී ලන්ඩනයට ගිය සංචාරයකට අදාළව “රජයේ මුදල් අවභාවිත කිරීම” සම්බන්ධයෙන් ඔහුගෙන් ප්‍රශ්න කිරීමෙන් පසුව වික්‍රමසිංහ මහතා අත්අඩංගුවට ගෙන තිබේ.4
රනිල් වික්‍රමසිංහ මහතා 2023 වසරේදී G77 සමුළුවකට සහභාගී වීම සඳහා හවානා සිට ආපසු එන අතරතුර ලන්ඩනයේ නැවතී තිබුණි.5
ඔහු සහ ඔහුගේ බිරිඳ වන මෛත්‍රී වික්‍රමසිංහ මහත්මිය වුල්වර්හැම්ප්ටන් විශ්ව විද්‍යාලයේ උත්සවයකට සහභාගී වී ඇත.
සිය බිරිඳ ඇයගේම ගමන් වියදම් දැරූ බවත් රාජ්‍ය අරමුදල් භාවිත නොකළ බවත් වික්‍රමසිංහ මහතා නිරන්තරයෙන් අවධාරණය කර ඇත.
කෙසේ වෙතත්, පොලිස් අපරාධ පරීක්ෂණ දෙපාර්තමේන්තුව චෝදනා කරන්නේ, වික්‍රමසිංහ මහතා පෞද්ගලික සංචාරයක් සඳහා රජයේ මුදල් භාවිත කළ බවත්, ඔහුගේ ආරක්ෂකයින්ටද වැටුප් ගෙවා ඇත්තේ රජය විසින් බවත්ය.
