මැලේසියාවේ බුකිට් ටම්බුන් ප්‍රදේශයේදී මත්ද්‍රව්‍ය වැටලීමක් අතරතුර ශ්‍රී ලාංකිකයෙකු අත්අඩංගුවට ගෙන තිබේ.
බර්නාමා පුවත් සේවයේ වාර්තාවකට අනුව, මත්ද්‍රව්‍ය බෙදාහරින්නන්ගේ ජාලයක් විසින් පවත්වාගෙන ගිය හෙරොයින් නිෂ්පාදනාගාරයක් වැටලීම් දෙකකින් මැලේසියානු පොලීසිය විසින් සාර්ථකව වටලා ඇත.
මෙම වැටලීම් වලදී, වයස අවුරුදු 25 ත් 46 ත් අතර මැලේසියානු ජාතිකයන් දෙදෙනෙකු සහ ශ්‍රී ලාංකිකයෙකු අත්අඩංගුවට ගෙන තිබේ.
“පස්වරු 4.29 ට ටමාන් ටම්බුන් පෙර්මායි හි නිවසක් වැටලීමේදී පොලිසිය විසින් දේශීය පුද්ගලයන් දෙදෙනෙකු හෙරොයින් ග්‍රෑම් 1,113 ක්, හෙරොයින් බේස් ග්‍රෑම් 641 ක්, කැෆේන් කිලෝග්‍රෑම් 4 ක් සහ මත්ද්‍රව්‍ය සැකසීමට භාවිතා කරන බවට සැක කරන උපකරණ කිහිපයක් සමඟ අත්අඩංගුවට ගෙන ඇත.”
“පළමු වැටලීම සිදු කළ ස්ථානයට නුදුරින් පිහිටි තවත් නිවසක් පස්වරු 5.04 ට පමණ වැටලීමේදී, කැෆේන් කිලෝග්‍රෑම් 26 ක් සමඟ ශ්‍රී ලාංකිකයෙකු අත්අඩංගුවට ගනු ලැබීය. වැටලීම් දෙකේදීම අත්අඩංගුවට ගත් මුළු මත්ද්‍රව්‍ය තොගයේ වටිනාකම රිංගිට් 74,500 කි.” ජ්‍යෙෂ්ඨ පොලිස් නිලධාරියෙකු ප්‍රකාශයක් කරමින් කියා සිටියේය.
බුද්ධි අංශ වාර්තා වලට අනුව, මෙම ජාලය ජනවාරි මාසයේ සිට මත්ද්‍රව්‍ය නිෂ්පාදන කටයුතුවල නිරත වී ඇති අතර ඔවුන් සැකසූ හෙරොයින් දේශීය වෙළඳපොළ සඳහා බව සඳහන් වේ.
අත්අඩංගුවට ගත් දේශීය පුද්ගලයන් දෙදෙනා මත්ද්‍රව්‍ය සහ අපරාධ සම්බන්ධයෙන් පෙර වැරදි වාර්තා ඇති අය වන අතර, ශ්‍රී ලාංකිකයාට පෙර වැරදි වාර්තා නොමැත.
දේශීය නිලධාරීන්ගේ ඇස්තමේන්තු වලට අනුව, අත්අඩංගුවට ගත් මුළු මත්ද්‍රව්‍ය ප්‍රමාණය ඇබ්බැහි වූවන් 49,500 කට භාවිතා කළ හැකි බව ගණන් බලා ඇත.
