හිටපු රාජ්‍ය අමාත්‍ය ලොහාන් රත්වත්තේ මහතා වයස අවුරුදු 57 දී අභාවප්‍රාප්ත විය. ඔහු කොළඹ පෞද්ගලික රෝහලක ප්‍රතිකාර ලබමින් සිටියදී මෙලෙස මියගිය බව වාර්තා වේ.
1968 ජූනි 22 වන දින උපත ලැබූ ලොහාන් එවීන්ද්‍ර රත්වත්තේ මහතා, කැපී පෙනෙන ශ්‍රී ලාංකික දේශපාලනඥයෙකි. ඔහු මීට පෙර මැණික් හා ස්වර්ණාභරණ ආශ්‍රිත කර්මාන්ත රාජ්‍ය අමාත්‍යවරයා ලෙසත්, බන්ධනාගාර කළමනාකරණ හා සිරකරුවන් පුනරුත්ථාපන රාජ්‍ය අමාත්‍යවරයා ලෙසත් කටයුතු කර ඇත. ඔහු මහනුවර දිස්ත්‍රික්කය නියෝජනය කළ හිටපු පාර්ලිමේන්තු මන්ත්‍රීවරයෙකි.
රත්වත්තේ මහතා 2009 දී මධ්‍යම පළාත් සභාවට තේරී පත් වූ අතර, පසුව ශ්‍රී ලංකා නිදහස් පක්ෂය (SLFP) නියෝජනය කරමින් 2010 ශ්‍රී ලංකා පාර්ලිමේන්තු මැතිවරණයේදී පාර්ලිමේන්තුවට තේරී පත් විය.
2012 දී එවක ජනාධිපති මහින්ද රාජපක්ෂ මහතා විසින් ඔහුගේ පියා වන ජනරාල් අනුරුද්ධ රත්වත්තේ මහතාගෙන් පසුව පත්දූම්බර ශ්‍රී ලංකා නිදහස් පක්ෂ ප්‍රධාන සංවිධායක ලෙස ඔහු පත් කරන ලදී. ඔහු මාර්ග සංවර්ධන රාජ්‍ය අමාත්‍යවරයා ලෙසද කටයුතු කළේය.
2015 සහ 2020 පාර්ලිමේන්තු මැතිවරණවලදී ඔහු නැවත තේරී පත් විය.
