කටුනායක බණ්ඩාරනායක ජාත්‍යන්තර ගුවන්තොටුපොළේදී චීන ජාතිකයන් පස් දෙනෙකු අත්අඩංගුවට ගෙන පිටුවහල් කර තිබේ.1
ඔවුන් සයිබර් අපරාධ සඳහා ශ්‍රී ලංකාවට ඇතුළු වීමට උත්සාහ කරන බවට සැක කෙරේ.2 මෙම පිරිස බැංකොක් සිට පැමිණි ගුවන් යානයකින් අද (13) උදෑසන 10.30ට කටුනායක ගුවන්තොටුපොළට පැමිණ ඇත.
ඔවුන්ගේ පැමිණීමේ අරමුණ පිළිබඳව සැකයක් මතුවීම හේතුවෙන් ආගමන විගමන දෙපාර්තමේන්තුවේ ප්‍රධාන නිලධාරියකු වෙත යොමු කර ප්‍රශ්න කිරීම් සිදුකර ඇත.
මෙහිදී ඔවුන් කොළඹ වරාය නගරයේ සමාගමක රැකියා සඳහා පැමිණි බවට සඳහන් කරමින් පදිංචි වීසා ඉදිරිපත් කර ඇත. කෙසේ වෙතත්, අදාළ සමාගමේ නිලධාරියෙකුගෙන් කළ විමසීමේදී ඔවුන්ගේ රැකියා හෝ පැමිණීමේ අරමුණ තහවුරු කිරීමට නොහැකි වී තිබේ.
තවදුරටත් කළ පරීක්ෂණවලදී ඔවුන්ගේ රැකියා ආරාධනා ලිපිවල නොගැලපීම් ඇති බවත්, මීට පෙර සයිබර් අපරාධවලට ප්‍රසිද්ධ කාම්බෝජයේ සහ පිලිපීනයේ සැක කටයුතු සමාගම්වල සේවය කර ඇති බවත් අනාවරණය වී ඇත.
මෙම කරුණු මත පදනම්ව ආගමන විගමන දෙපාර්තමේන්තුව විසින් මෙම චීන ජාතිකයන් පස්දෙනා පිටුවහල් කිරීමට කටයුතු කර ඇත.3
