වාර්ෂිකව අගෝස්තු 9 වන දින සමරනු ලබන මෙම උත්සවය ආරම්භ වූයේ දිවංගත ආදිවාසී ප්‍රජා නායක ඌරුවරිගේ තිසාහාමි ඇත්තෝ මහතාගේ ප්‍රතිමාවට ජනාධිපතිතුමා විසින් පුෂ්පෝපහාර දැක්වීමෙනුයි. එමෙන්ම, ජනාධිපතිතුමා කෞතුකාගාරයේ මධ්‍යම මළුවෙහි සුදු සඳුන් පැළයක් ද රෝපණය කළා.
මෙම අවස්ථාවේදී, ආදිවාසී ප්‍රජාවේ ගැටලු ඇතුළත් පණිවිඩයක් සහ සමරු ඵලකයක් වන්නිලඇත්තෝ මහතා විසින් ජනාධිපතිතුමාට පිළිගන්වන ලදි. ඊට ප්‍රතිචාර වශයෙන් ජනාධිපතිතුමා විසින් ආදිවාසී නායකයාට තෑග්ගක් පිරිනැමුවා.
සැමරුම තුළදී ආදිවාසී ප්‍රජාවටම ආවේණික වූ සංස්කෘතික අංග රැසක් ද ඉදිරිපත් කෙරුණු අතර, සාමය සහ සෞභාග්‍යය උදෙසා පවත්වනු ලබන සාම්ප්‍රදායික ‘කිරි කොරහ’ චාරිත්‍රය ද ඊට ඇතුළත් විය. මීට අමතරව, ශ්‍රී ලංකාවේ ප්‍රථම ආදිවාසී ශාකසාර සබන් වර්ගය වන “කෛරී” ද එළිදැක්වූ අතර, ආදිවාසී කාන්තාවන් සඳහා සබන් නිෂ්පාදනය පිළිබඳ පුහුණු වැඩසටහනක් ද මෙම අවස්ථාවේදී ආරම්භ කෙරුණා.
ලෝක ස්වදේශික ජනතා දිනය පිළිබඳ ජාතික සැමරුම ප්‍රථම වරට ශ්‍රී ලංකාවේදී පැවැත්වූයේ 1999 වසරේදී කොළඹ විහාරමහාදේවි උද්‍යානයේදී වන අතර, ඒ 1996 වසරේ ජිනීවා නුවර පැවති ස්වදේශික සමුළුවට වන්නිලඇත්තෝ මහතාගේ සහභාගීත්වයෙන් පසුවයි.
